Mo Sciatháin Briste

Dúirt Muire i gcogar liom

Inniu

“Ná lig de na rúin cur isteach ort…

Ná bí buartha futhu…

Táimse i d’theannta…

Ná dein dearmad ar t’anam

Ná ar anamacha do mhuintir

Bí cróga

Seas in aghaidh na gaoithe

Ó a Mhuire, a Mharia

Táim lag agat

Lag ó bheith ag smaoineamh

Mearbhall orm

Cosúil le caoire le galar cam

Cím rud éigin ag corraí sa ghort

Rud éigin dubh

Dorcha

An diabhal…

Ab ea…?

Táim scanraithe anois

Ní scaoilfidh me na rúin le héinne

Ach a Mháthair

Tá cnopán mór

Curtha agat ar mo dhrom

Táim cosúil leis an seanleaid

A bhí ag teacht ón nDaingean

Agus a chuala na púcaí ag canadh

Agus a dhein pairseach don amhrán

Dé Luain, Dé Máirt

Dé Luain, Dé Máirt

Bain díom an t-ualach

Saor mé ón gcreideamh seo

Lig dom seasamh suas díreach

Go dtógfaidh tú i do bhaclainn me

Agus go bpógfaidh tú

Mo sciatháin briste.

An Ghealach Gorm

D’eirigh an ghealach gorm

Amach as an doiricheacht

Ní raibh éinne timpeall chun cabhrú liom

Chuala an mada rua ag liúreach

Agus uan bheag bhán ag béicigh

An nadúr corraithe

Sceoin im’ chroí.

Bhíse imithe uaim

An gomh ort chugam

Nuair ná raibh an dínnéar

Réitithe i gceart duit

Breall ort

Furist breall a chur ort…

Bhí an oíche ar lasadh fén dtrath seo

An ghealach lán sa spéir

Dhúnas na fuinneoga

Chuireas na baltaí ar na dóirse

Mhúcas na soilse

Agus shuíos im chathaoir cois tine

Ag éisteacht agus

Ag fanacht.

Bhí an mada rua le clos fós

Ach bhí an t-uan balbh

Mise ann fós

Ag éisteacht agus

Ag fanacht. 

An Gadaí Gránna

’Sé seo an saol

Saol gan mhaith

Gan gháire

Gan ghreann.

Níl éinne im’ shaol anois

Bhí fear ann tráth

Ach…d’imigh sé…

Ar imirice chun na hAifrice

A dúirt sé liom.

Scríbhneoir ab ea é

A dúirt sé liom

Philanthropist

Huh!

Ag scríobh aistí

Ní bhfuaireas é sin amach

Go dtí an lá a dúirt sé

Slán.

Aistí!...huh!

Ní mór mar sin

An scríbhneoir é

Ag ligint air

Go bhféadfadh sé scríobh

Ag ligint air

Go raibh sé i ngrá liom.

Ghoid sé mo chroí

An gadaí gránna.

Ghoid sé m’anam

Agus ghoid sé mo chorp.

Ghoid sé an fuinneamh a bhí ionam.

Táim mar rud marbh anois aige

Rud caite críonna…bailithe

Agus é fhéin…bailithe leis

Go meidhreach

An bother síos

Ar a bhicycle

Slán leat

A sheanrud gan mhaith.

Dein staidéar ar bhean eile,

Ar chultúr eile

Ar chroí eile

Ar amadán eile…

Táim níos fearr as

I m’aonar.

Is ag Dia amháin atá fhios

Cá bhfuileann tú uaim, a chroí

Táim ag fanacht leat

Mo shaol go léir.

D’imís uaim ar nós gal gaoithe

Gan tásc ná tuairaisc ort

Le blianta fada.

Tá an rós a thugais dom

Fós go h-álainn

Suite istigh idir dhá leathanach

An Bhioba Naofa

Triomaithe ar feadh na síoraíochta

Cumhra álainn mór thimpeall mo thig.

An cuimhin leat an tráthnóna san

A chuamar go dtí Cill Airne

Bhí relics Naomh Treasa sa Chathedral

Scuaine mílte ar fad

Gach éinne socair

Beagán báistí

Gan éinne  ag gearán

Ceo bog ár gclúdach

Blaincéad

Chuir sé Auszwich i gcuimhne duitse

Chuir sé Neamh i gcuimhne dósa

D’athraigh an turas sin go Cill Airne gach rud

D’imigh an pian a bhí im’ cheann agam

Agus d’imigh tusa om’ thaobh

Neadar cad a tharla

Is ag Dia amháin atá a fhios.

Maria Ní Mhurchú

Dán do shaghas eile...

COUREL dos tesos cumes que ollan de lonxe!

Eiquí síntese ben o pouco que é un home...

                                                       

High mountains of Courel that look far away!

Here you can feel how small a person can be...

                                                Uxío Novoneyra

Féach ar shléibhte Courel a fhéachann i bhfad ó bhaile!

Anseo is féidir a bhrath cé chomh beag bídeach is is féidir le duine a bheith…

                                                Maria Ní Mhurchú

An Colúr Bán

Ní féidir liom codladh anocht.

An iomarca ag titim amach ar fuaid an domhain

Ná féach ar an dteilifís mar sin!

Ach níl aon leigheas agam air

Pictiúirí ag cur as dom’ cheannaín bocht.

Socraím an piliúr

Éistím leis na blues

Léim leabhar

Deirim paidir.

Táim ag fanacht le Ian ach

Níl tásc ná tuairisc air…

Cloisim an ghloine á briseadh thíos staighre

Ó Chríost, cad a dhéanfad nó cé tá ann…?

Éirím as mo leaba, mo dhá chos cosúil le jelly

Éalaím síos an staighre

Shh! Tá glór sa seomra suite.

Osclaím an doras go mall

Ar crith agus mo chroí cosúil le pump

Tá an vás a bhí suite os cionn na tine

Briste i smidiríní ar fuaid an urláir

Agus éan ag eitilt ón dteilifís

Go dtí an chathaoir

Go dtí an bord

Cac ar fuaid na háite aige.

Deirim paidir

Tá an t-éan bocht níos a mheasa ná mar atáimse.

Scaoilim saor é isteach i ndoircheacht na hoíche

Agus deinim cupán tae

Cím scáth an cholúir bháin sa ghealach agus

É ag eililt i dtreo na réiltíní.

Fear a’ Tí

Tánn tú suite ansan

Ar do sháimhín só

Beag beann ar an saol

Lasmuigh de do dhoras

Cathaoir órga faoid’ thóin

Agus leanbh breá beathaithe

Ataithe

Faoi d’ascail.

Tá leanaí na tíre seo

Ataithe

Chomh maith

Ach ní ag caviar

Ach ag aer tirim na dúiche…

Is maith liom an dath dearg

Atá ar do ghúna galánta

Ach b’fhearr liom

A bheith istigh i bpluais

Seachas cur suas leis

An bpusachán atá pósta leat.

An gcuimhníonn  tú riamh ormsa anois?

Bhís ana-mhór liom nuair a bhíomar óg.

Sciobais mo leannán uaim

Le do chuid airgid agus ardnósanna.

Bhailíos liom chuig an Aifric

Croíbhriste.

Nósanna de shaghas eile amuigh anso

A thógann tamall dul i dtaithí orthu

Ach nach mise a bhí ámharach

Gur thugas na cosa go deas liom.